რამდენიმე მაღალი რანგის დემოკრატმა სააგენტო Axios-ს განუცხადა, რომ პარტიის კონგრესის ლიდერებისა და ახლო მეგობრების მზარდი ზეწოლა აშშ-ის პრეზიდენტ ჯო ბაიდენს დაარწმუნებს, რომ საპრეზიდენტო რბოლას ამ შაბათ-კვირას გამოეთიშოს.
„81 წლის პრეზიდენტი, რომელიც ახლა კოვიდის გამო თვითიზოლაციაში იმყოფება, კვლავ სამუშაოშია ჩაფლული. მაგრამ ის შეეგუა მზარდ ზეწოლას, ცუდ გამოკითხვებსა და უსაფუძვლო შემოწმებას, რაც შეუძლებელს ხდის მისი კამპანიის გაგრძელებას“, – განუცხადეს დემოკრატებმა გამოცემას.
მათი თქმით, პარტიის უმაღლესი ლიდერები, მეგობრები და მთავარი დონორები მიიჩნევენ, რომ ბაიდენი საპრეზიდენტო არჩევნებში ვერ გაიმარჯვებს, ვერ შეცვლის საზოგადოების წარმოდგენას მისი ასაკისა და გონებრივი სიმახვილის შესახებ და ვერ უზრუნველყოფს უმრავლესობას კონგრესში.
„პრეზიდენტს ეუბნებიან, რომ თუ ის დარჩება, ექსპრეზიდენტ ტრამპს შეუძლია, დიდი გამარჯვება მოიპოვოს და ნოემბერში ბაიდენის მემკვიდრეობა და დემოკრატების იმედები გაანადგუროს. ბაიდენზე ზეწოლა, რომ მოხსნას თავისი კანდიდატურა, აუტანელ დონემდე იზრდება, განსაკუთრებით ბოლო რამდენიმე დღის განმავლობაში. ბაიდენის წინააღმდეგ პანიკური ზეწოლის კამპანია მიმდინარეობს, რომელიც მუდმივი და კოორდინირებულია“, – ნათქვამია სტატიაში.
დემოკრატები სრულად მოელიან, რომ რესპუბლიკური პარტიის ეროვნული ყრილობის შემდგომი გამოკითხვები აჩვენებს შესაძლო დამარცხებას, რამაც შეიძლება, კონგრესში დემოკრატების დამარცხებაც გამოიწვიოს.
„მისი არჩევანია, გახდეს ისტორიის ერთ-ერთი გმირი, ან დარწმუნებული იყოს, რომ ბაიდენის საპრეზიდენტო ბიბლიოთეკა არასოდეს იარსებებს. ვლოცულობ, რომ ის სწორად მოიქცეს. ის ამ მიმართულებით მოძრაობს“, – თქვა პრეზიდენტის ერთ-ერთმა ახლო მეგობარმა.
ამასთან, სენატის უმრავლესობის ლიდერმა, ჩაკ შუმერმა ტრამპის მკვლელობის მცდელობის დღეს ბაიდენს უთხრა, რომ უკეთესი იქნებოდა, თუ ის უარს იტყოდა არჩევნებში მონაწილეობაზე. დემოკრატებს კაპიტოლიუმში სურთ, ის არჩევნებს გამოეთიშოს და ღელავენ, რომ, წინააღმდეგ შემთხვევაში, ისინი ადგილებს დაკარგავენ.
„დემოკრატების წარმომადგენლები იმედოვნებდნენ, რომ ამ ყველაფერს თავიდან აიცილებდნენ. მათ უყვართ და პატივს სცემენ ბაიდენს და აფასებენ მის ისტორიულ მიღწევებს“, – წერს გამოცემა.
