მოსკოვი არ გამორიცხავს ბირთვული აღჭურვილობის რაკეტების განთავსებას გერმანიაში აშშ-ის შორ მანძილზე მოქმედი რაკეტების განთავსების საპასუხოდ. ამის შესახებ ჟურნალისტებს რუსეთის საგარეო საქმეთა მინისტრის მოადგილემ სერგეი რიაბკოვმა განუცხადა, იუწყება რუსული მედია.
მისი თქმით, საპასუხოდ მოსკოვი არცერთ ვარიანტს არ გამორიცხავს და აღნიშნა, რომ კალინინგრადის ოლქის დაცვა, რომელიც ნატოს წევრ პოლონეთსა და ლიეტუვას შორისაა მოქცეული, განსაკუთრებული ყურადღების ცენტრში იქნება.
„თუ გერმანიის ფედერალური მთავრობის წარმომადგენლები გამართლებულად მიიჩნევენ, რაიმე სახის ესკალაციური ღონისძიებების დაწყებას იმ საბაბით, რაც გვაქვს ამ კონკრეტულ რეგიონში (კალინინგრადის ოლქში), მაშინ ჩვენ ვიმოქმედებთ საკომპენსაციო ღონისძიებების კუთხით ისე, როგორც ყველაზე მიზანშეწონილად მიგვაჩნია“, – აღნიშნა მინისტრის მოადგილემ.
რიაბკოვის თქმით, ნატოს ქვეყნების ერთობლივი შესაძლებლობების გათვალისწინებით, რუსეთმა უნდა შეაფასოს თავისი პასუხები ისე, რომ არ განიცადოს „შიდა შეზღუდვები“ იმის თაობაზე, თუ რა შეიძლება განთავსდეს, სად და როდის.
„ეს არის მაქსიმალურად ფართო არჩევანის შესაძლებლობა. ეს არავისთვის საფრთხეს არ წარმოადგენს. ეს არის გზა, ვიპოვოთ ყველაზე ეფექტური, მათ შორის ღირებულების თვალსაზრისით, რეაგირების ალგორითმი ცვალებად გამოწვევებზე“, – განაცხადა მან.
ამასთან, გერმანიის თავდაცვის მინისტრმა, ბორის პისტორიუსმა განაცხადა, რომ ქვეყანაში აშშ-ის რაკეტების ადგილმდებარეობა ჯერ არ არის განსაზღვრული.
10 ივლისს გამოქვეყნდა შეერთებული შტატებისა და გერმანიის ერთობლივი განცხადება, რომელშიც ნათქვამია, რომ ვაშინგტონი 2026 წელს გერმანიის ტერიტორიაზე ახალი ცეცხლსასროლი იარაღის განთავსებას დაიწყებს, რომელიც იქნება უფრო დიდი დიაპაზონის, ვიდრე ისინი, რაც ამჟამად ევროპაშია განთავსებული.
რუსეთის ელჩმა შეერთებულ შტატებში, ანატოლი ანტონოვმა განაცხადა, რომ ვაშინგტონის ასეთი გეგმები ზრდის სარაკეტო შეიარაღების რბოლის ალბათობას და შეიძლება, უკონტროლო ესკალაცია გამოიწვიოს.
