მედიაში გავრცელებული ინფორმაციით თაკო ტაბატაძე და გია ბაღაშვილი ერთმანეთს დაშორდნენ. წყვილმა 2009 წელს იქორწინა, იმჟამად თაკო 18 წლის იყო და მათ შორის 19-წლიანი ასაკობრივი სხვაობა იყო.
მიუხედავად მათი დაშორების შესახებ გავრცელებული ჭორებისა, ამას მედიასთან წლების განმავლობაში არ ადასტურებდნენ. ახლა კი “ამბებთან” საუბრისას თაკო ამბობს, რომ ბავშვებისთვის სტრესის არიდებას ცდილობდნენ და ამაზე საჯარო საუბარი არ სურდათ.
„მინდა გითხრათ, რომ მე და გია უკვე მესამე წელია, რაც გაშორებულები ვართ და ცოლ-ქმარი აღარ ვართ. წლების განმავლობაში სამომავლო გეგმებთან დაკავშირებით განსხვავებული ხედვები ჩამოგვიყალიბდა და ამიტომაც გადავწყვიტეთ ცალკ-ცალკე გაგვერძელებინა ცხოვრება, თუმცა ერთმანეთთან კარგი ურთიერთობა გვაქვს.
ჩვენ გვყავს 4 საოცარი გოგონა, რომელთაც ერთობლივი ძალისხმევით ვზრდით და ყველანაირად გვერდში ვუდგავართ ერთმანეთს. პატარები ჩემთან არიან და ჩემი მთავარი ამოცანა მათი აღზრდაა, მაგრამ გია მაქსიმალურ დროს ატარებს ბავშვებთან და მეც ყველანაირად ვუწყობ ხელს ამაში.
ჩვენი გაშორების ფაქტის საჯარო გამომზეურებაზე სწორედ იმ მიზეზით ვთქვით უარი, რომ ბავშვებისთვის ზედმეტი სტრესი აგვერიდებინა.
ჩემთვის მთავარი ამოცანა პატარების აღზრდაა და ახლა ნაადრევია პირად ცხოვრებაში მნიშვნელოვან ცვლილებებზე ლაპარაკი. გარდა ამისა, წელს ვამთავრებ თეატრალურ უნივერსიტეტს, სამსახიობო ფაკულტეტს. დავიწყე აქტიური სამსახიობო კარიერა და ბედნიერი ვარ, რომ მყავს ოთხი საოცარი გოგონა და ვაკეთებ ჩემს საყვარელ საქმეს.
ახლა კოვიდი აქვთ ბავშვებს, სავარაუდოდ, სკოლაში დაემართათ. სამი დღის წინ, შუაღამეს აუწია სიცხე ჩემს უფროს გოგონას და შემდეგ დანარჩენებსაც, იმავე ღამეს. ძალიან ვინერვიულე, მაგრამ, საბედნიეროდ ახლა კარგად არიან. მეც გადამედო და ახლა მე მაქვს მწვავე სიმპტომები: მაღალი სიცხე, ხველა და სუნთქვის გაძნელება, თუმცა ვახერხებ სახლის პირობებში გავუმკლავდე ამ ყველაფერს“ – განაცხადა თაკო ტაბატაძემ.
წყარო ambebi.ge
