გარდაიცვალა მოზარდ მაყურებელთა თეატრის მსახიობი, სახელმწიფო პრემიის ლაურეატი ბესო მეგრელიშვილი – ინფორმაციას, თეატრის პროდიუსერი ავრცელებს.
„უმძიმესი დილა გაუთენდა მოზარდ მაყურებელთა თეატრს! მოულოდნელად გარდაიცვალა ჩვენი თეატრის წამყვანი არტისტი ბესო მეგრელიშვილი! სიტყვები უძლურია – 31 მარტს და 1 აპრილს სპექტაკლები ითამაშა, ხუმრობანარევად წაიწუწუნა – რაღაც ვერ ვარ კარგად, წნევა შემომეჩვიაო… ვაჰ… ჯერ მეტს ვერაფერს ვწერ“,- წერს ნოდარ დუმბაძის სახელობის მოზარდ მაყურებელთა თეატრის სამხატვრო ხელმძღვანელი, რეჟისორი დიმიტრი ხვთისიაშვილი.
სამწუხარო ინფორმაციას, მოზარდ მაყურებელთა თეატრის მსახიობი ნიკუშა ფაიქრიძე ეხმიანება და საყვარელ კოლეგას, ლექსს უძღვნის:
„ბოლო მონოლოგი… ბესო მეგრელას… (ვუძღვნი დიდი სიყვარულით)
„აჰა ფინალი…
აჰა ტაში…
დახურეთ ფარდა –
წავედი და ეს როლიც მშვენის…
ბოლო ღიმილით,
ხელს გიქნევთ და
ვამთავრებ სპექტაკლს,
ვასრულებ ამით ფორიაქს და
არტისტულ შეშლას …
ცხოვრებას –
როგორც სცენის კოსწუმს,
საკიდზე ვკიდებ,
რაღაც უცხოს და ამოუხსნელს,
სიჩუმით ვირჩევ …
არტისტულ ბედით მოარული,
ვაგრძელებ სხვა გზას,
ამ ბოლო როლით
დროს ვუძებნი – ჩემებურ ახსნას…
და ჰა, ფინალი…
თქვენი ტაში…
ჩემი სიჩუმე …
თითქოს არტისტმა,
არტისტულად ბედთან ვიხუმრე…“
ლექსის ავტორი ნ. ფაიქრიძე
