“მეტი პატივისცემა გმართებთ მასპინძელი ქვეყნის მოსახლეობის მიმართ! დღეს მსხვერპლი უკრაინელი ხალხია! და არ გვინდა, რომ ხვალ ჩვენ ვიყოთ!”- ქართველები” – მიმართვა კელი დეგნანს 

ჟურნალისტი ბონდო მძინარაშვილი ამერიკის ელჩს საქართველოში კელი დეგნანს მიმართავს და სოციალურ ქსელში წერს:

“ძალიან მნიშვნელოვანია, საქართველოს მოსახლეობას ახსოვდეს, რომ რუსეთს ოკუპირებული აქვს თქვენი ტერიტორიის 20 პროცენტი. სწორედ რუსეთი ცდილობდა თქვენი ენის გაქრობას. რუსეთი ანგრევდა თქვენს ეკლესიებს და ცხოველების სადგომებად იყენებდა.” (კელი დეგნანი).
ვახ, რა დღეში ვართ?!
დავიწყების საშუალებასაც არ გვაძლევენ!
ძლივს დაგვავიწყდა, რომ რუსეთს ოკუპირებული აქვს ჩვენი ტერიტორიის 20 პროცენტი და უცბად გაგვახსენა ქალბატონმა ელჩმა.
ძლივს დაგვავიწყდა, რომ რუსეთი ცდილობდა ჩვენი ენის გაქრობას და აგერ, ელჩმა არ შეგვახსენა?!
აბა, ვის გახსოვდათ, რომ “რუსეთი ანგრევდა თქვენს ეკლესიებს და ცხოველების სადგომებად იყენებდა”?!
არავის! აღარავის!
მერედა, რატომ?! რატომ დაივიწყეთ?!
არ გრცხვენიათ?!
მაგრამ ჩვენ, ამერიკელები არ მოგცემთ დავიწყების საშუალებას! არავითარ შემთხვევაში!
ახლა კი სერიოზულად:
ქალბატონო ელჩო, თქვენ სერიოზულად ფიქრობთ, რომ ჩვენ ამის შეხსენება გვჭირდება?!
თქვენ სერიოზულად ფიქრობთ, რომ ჩვენზე მეტად გტკივათ ჩვენი სამშობლოს ოკუპირებული 20 პროცენტი?!
თქვენ სერიოზულად ფიქრობთ, რომ რუსეთი მთელი 200 წლის განმავლობაში რას აკეთებდა ჩვენი ენის წინააღმდეგ, ჩვენზე კარგად იცით და თქვენგან შეხსენება გვჭირდება?!
თქვენ სერიოზულად ფიქრობთ, რომ თქვენგან შეხსენება გვჭირდება, რუსეთი როგორ ანგრევდა ჩვენს ეკლესიებს და, რაც დანგრევას გადაურჩა, როგორ იყენებდა ცხოველების სადგომად, აბანოდ და საწყობად?!
ქალბატონო ელჩო, თქვენ ამერიკის შეერთებული შტატების ელჩი ხართ და მეტი პატივისცემა გმართებთ მასპინძელი ქვეყნის მოსახლეობის მიმართ!
ჩვენ თქვენგან შეხსენება არ გვჭირდება, როგორ მტრობდა და მტრობს რუსეთი საქართველოს!
ჩვენ ეს ყველაფერი ზეპირად ვიცით!
ესეც და კიდევ ბევრი სხვაც ვიცით!
ამიტომ ვიბრძოდით რუსეთისგან თავის დასახნელად!
ამიტომ ვიბრძოდით საქართველოს დამოუკიდებლობისთვის და სუვერენიტეტისთვის!
ამ ბოლო სიტყვას საგანგებოდ მიაქციეთ ყურადღება!
ჩვენ არ გვიბრძოლია რუსეთის წინააღმდეგ ამერიკის სასარგებლოდ!
ჩვენ საქართველოსთვის ვიბრძოდით!
ჩვენ იმისთვის არ გვიბრძოლია, რომ საქართველოში ცეკას მეორე მდივანი ამერიკის ელჩს ჩაენაცვლებინა!
ეს არ ყოფილა ქართველთა სურვილი და ოცნება!
არც მიზანი ყოფილა!
დღეს კი ჩვენი სამშობლო იქცა სამიზნედ – იქიდან და აქედან, ჩრდილოეთიდან და სამხრეთიდან, დასავლეთიდან და აღმოსავლეთიდან!
ჩვენ არ გვინდა, რომ ჩვენი სამშობლო კვლავაც საომარ ლელოდ იქცეს!
ეს უკვე იყო! გუშინ იყო! და აღარ გვინდა!
“ორ ზღვას შუაც” აღარ ვართ და ცისკრის ვარსკვლავიც ჰიმნში ბრწყინდება, – საითაც გავიქცევით, იქით წავიქცევით!
თქვენ კი, ქალბატონო ელჩო, დეპოლარიზაციაზე რომ გველაპარაკებით, იმავდროულად, ცეცხლზე ნავთს ნუ დაასხამთ!
ძალიან მეეჭვება, რომ ამ ცეცხლზე გათბეთ, რადგან პირველი სწორედ შეერთებული შტატების საელჩო წავიდა კიევთან მიახლოებული საფრთხის გაჩენისთანავე! საერთოდ წავიდა ქვეყნიდან!
დღეს რუსეთი ბომბავს და ანადგურებს უკრაინის ქალაქებს და სოფლებს, მშვიდობიან მოსახლეობას!
დღეს მსხვერპლი უკრაინელი ხალხია!
და არ გვინდა, რომ ხვალ ჩვენ ვიყოთ – ქართველები!
რადგან ჩვენ ჩვენი სამშობლო და ხალხი გვადარდებს!
თქვენ კი ნებისმიერ შემთხვევაში კარგად იქნებით!
კარგად იყავით!