თურქეთში ძლიერი მიწისძვრა მოხდა, რომელსაც ასობით ადამიანის სიცოცხლე ემსხვერპლა.
ქართველი ემიგრანტი ია ბირკაძე ტრაგიკული შემთხვევის შესახებ პრაიმტაიმთან საუბრობს:
„სამი წუთის მანძილზე ფეხზე ვერ ვდგებოდით. ჩემს ბინაში ვიმყოფებოდი, როცა სადღაც, გამთენიის 4 საათზე დიდი რყევა ვიგრძენი. ხალხის ყვირილი მესმოდა, კარი გავაღე, ვყვიროდი, რომ არ გასულიყვნენ გარეთ, ლიფტში არ შესულიყვნენ, კიბით ესარგებლათ. 13-სართულიან ბინაში მერვეზე ცხოვრობ. მე და ჩემი მეუღლე რბილ დივანთან დავდექით, მაგრამ დიდხანს რომ გაგრძელდა რყევები, დავიბენით და რა გაგვეკეთებინა, ვერ ვხვდებოდით. სანამ ყველაფერი არ ჩაწყნარდა, გარეთ ვერ გავედით.
შემდეგ ჩავედით დაბლა, სხვებიც გამოსულები იყვნენ. ახალი კორპუსები შენდება და იმის შეგვეშინდა. ბაზარი იყო ღია და მთელი ღამე, ადიელამოსხმულებმა იქ გავატარეთ. შემდეგ სახლებში დავბრუნდით, გვითხრეს, რომ საფრთხე აღარ იყო.
ჩვენგან ნახევარი საათის სავალ გზაზე ბინები დაინგრა, ხალხი დაიხოცა. ამ წუთებშიც ნანგრევებიდან ხალხის ამოყვანის სამუშაოები მიმდინარეობს. ჩემი მეუღლეც წავიდა დასახმარებლად. ვისაც რა შეუძლია, ყველაფერს აკეთებს. ჩვენს ქალაქშიც ბევრი ძველი ბინა დაინგრა.
ადანა მიწასთან გასწორდა. საჩხერეში რომ მოხდა მიწისძვრა, [1991 წელს, მიწისძვრის სიდიდემ 9 მაგნიტუდა შეადგინა. სოფელი ხახიეთი (მიწისძვრის ეპიცენტრი) მთლიანად განადგურდა] მაშინ საქართველოში ვიყავი და ყველაფერი წამიერად მოხდა. ეს იმას არ ჰგავდა. დაიწყო და რყევა აღარ დამთავრდა. სად რა მიდიოდა, ვერ ვხვდებოდი.
– ამ წუთებში რა ხდება?
– ახლა ტელევიზორს ვუსმენ და სპეციალისტები ამბობენ, რომ მიწისძვრა სამ სხვადასხვა ადგილას მოხდა და ეს ყველაფერი ამან გამოიწვია. სხვათაშორის, თურქები მიწისძვრას ელოდებოდნენ, მაგრამ როდის და რანაირად, ამის პროგნოზი არ არსებობდა. სულ აცხადებდნენ, რომ მოსალოდნელია მიწისძვრები, ჩვენ ამისთვის ვემზადებოდით, თუმცა, სხვა რეგიონს, სტამბოლს ვვარაუდობდით. ყოველთვის იყო სარეკლამო რგოლები, როგორ გადავირჩინოთ თავი მიწისძვრის დროს.
ჩემი მეუღლე თურქია და ნათქვამი აქვს, რომ იყო დრო, როცა ჩემი ქალაქი მიწასთან გასწორდა, ბავშვობიდან მახსოვსო. მისი თქმით, ადანა ხელახლა აშენდა.
პატარ-პატარა ბიძგები ახლაცაა. შეიძლება შიშის გამოც მეჩვენება, მაგრამ ჭაღი დიდ ხმას რომ გამოსცემს, უკვე ვხვდები.
ჩემს შვილს ბავშვობიდან ეშინოდა მიწისძვრის. აქ მუშაობს უკვე 6 წელია და შენობაში ვერ შეჰყავთ, ისეა. ერთ-ერთ ოფიციალურ დაწესებულებაში მუშაობს, მოხუცებთან, ახლაც სამსახურშია. მირეკავს და მეუბნება, დედა, მოხუცებს რა უნდა ვუყო, არ ვიციო”
ცნობისთვის, 6 თებერვალს, გამთენიისას მომხდარი მიწისძვრის ეპიცენტრი თურქეთის სამხრეთ-აღმოსავლეთში მდებარეობდა. თურქული სააგენტო „ანადოლუ“ საგანგებო სიტუაციების სამსახურზე დაყრდნობით წერს, რომ 7,4 მაგნიტუდის მიწისძვრის ეპიცენტრი კახრამანმარაშის პროვინციაში, 7 კილომეტრის სიღრმეზე იყო.
წყარო: primetime.ge
