როგორ უნდა მოიქცეთ მიწისძვრის დროს – ინსტრუქცია შენობაში, ქუჩაში, ავტომობილსა და ნგრევის ზონაში მყოფთათვის

ფოტო: ტემატური

როგორც ცნობილია, თურქეთში მომხდარ ძლიერ მიწისძვრას დიდი მსხვერპლი მოჰყვა. ღმერთმა ყველა დაგვიფაროს, მაგრამ აუცილებელია ვიცოდეთ როგორ უნდა ვიქცეოდეთ მიწისძვრის დროს საფრთხის მაქსიმალურად შესამცირებლად.

მიწისძვრის დროს საფრთხის თავიდან ასაცილებლად, რეკომენდებულია რამდენიმე ქმედება:

თუ შენობაში ხართ:

დარჩით ადგილზე! შეძვერით მაგიდის ან სხვა ავეჯის ქვეშ და ხელები ქვემოდან მიაბჯინეთ. მოშორდით ფანჯრებს, ბუხრებს, მძიმე ავეჯსა და ხელსაწყოებს;

თავი შორს დაიჭირეთ ისეთი ნივთებისგან, რომლები შესაძლოა, ჩამოვარდეს, მაგალითად ჭაღი, კედლის კარადები და ა. შ.

სასწრაფოდ დატოვეთ სამზარეულო, რადგან შეიძლება, კედლიდან ავეჯი ჩამოცვივდეს;

არ გაიქცეთ კიბეებისკენ ან არ გავარდეთ გარეთ, სანამ ბიძგები არ შეჩერდება. როგორც კვლევებმა აჩვენა, ადამიანების დიდი ნაწილი დაზიანებებს ძირითადად შენობების დატოვების დროს იღებს;

არ გამოიყენოთ ლიფტი.

თუ ქუჩაში ხართ:

თუ ქუჩაში ხართ, ეცადეთ მოშორდეთ შენობებს, შუქნიშნებს, ელექტროგადამცემ კაბელებს და გადით შედარებით ღია, ცარიელ სივრცეში.

თუ საჭესთან ხართ:

თუ საჭესთან ხართ, შეჩერდით, მაგრამ ფრთხილად. შეეცადეთ, თქვენი მანქანა მოძრაობის ზონიდან რაც შეიძლება შორს გაიყვანოთ;

არ გაჩერდეთ ხიდზე ან მის ქვეშ, ესტაკადების, შუქნიშნების, ხეების, განათების ბოძებისა თუ საგზაო ნიშნების ქვეშ;

დარჩით მანქანაში ბიძგების შეწყვეტამდე;

მოძრაობის გაგრძელებამდე გაეცანით ახალ ამბებს, რათა შეიტყოთ, რაიმე დაზიანება ხომ არ მოხდა გზის იმ მონაკვეთზე, საით წასვლასაც აპირებთ.

თუ ნანგრევებში მოჰყევით:

არ აანთოთ ასანთი;

არ იმოძრაოთ ან არ სცადოთ მტვრის მოშორება;

პირზე აიფარეთ ტანსაცმელი;

შეეხეთ მილს ან კედელს, რათა მაშველებმა ადვილად მოგაგნონ. იყვირეთ, მაგრამ გახსოვდეთ, რომ ამ დროს შესაძლოა მავნე მტვერი გადაგეყლაპოთ.