“ქართული ოცნების” პროპაგანდისტების ეს განცხადებები, ფორმალურად სხვადასხვა ადამიანის სახელით და გვარით ვრცელდება, მაგრამ უნდა ვიცოდეთ, რომ ამას აქვს ერთი სახელი და გვარი, მისი ავტორია ოლიგარქი ივანიშვილი, რომელიც სანახევროდ დასავლური სანქციების პირობებში იმყოფება და საქართველოს და საქართველოს მოქალაქეების ინტერესების დაზიანების ხარჯზე ცდილობს საკუთარი პრობლემების მოგვარებას.
მოვუწოდებთ ივანიშვილს და “ქართული ოცნების” ლიდერებს, დროზე მოეგონ გონს და შეწყვიტონ საქართველოს დამაზიანებელი ქმედებები, საქართველოს ეროვნული ინტერესის ღალატი.
ჩვენ, “სტრატეგია აღმაშენებლის” გუნდი ანტიდასავლური, ანტიამერიკული კამპანიის მიზნების და ამოცანის შესახებ ბოლო დღეებში ვაფრთხილებდით ჩვენს მოქალაქეებს, რომ ეს არ ხდება შემთხვევით, მას ორგანიზებულად და მიზანმიმართულად ახორციელებენ საქართველოში მოვლენილი ფსბ-ს კურატორები ქართველი მესენჯერების (ინფორმაციის გამავრცელებლების) საშუალებით. არსებითი მნიშვნელობა არ აქვს კონკრეტულ წერილებს “ქართული ოცნების” რომელი ლიდერის სახელი და გვარი მიეწერება.
ამის დასტურია თუნდაც ბოლოს, ყაველაშვილის სახელით ამერიკის ელჩის მიმართ ცილისმწამებლური განცხადება. ყველამ ძალიან კარგად ვიცით, რომ ყაველაშვილი დამოუკიდებლად ამ განცხადების ერთ აბზაცსაც ვერ დაწერს.
ჩვენ, “სტრატეგია აღმაშენებელი” კიდევ ერთხელ მივმართავთ საქართველოს მოქალაქეებს, ვიყოთ ძალიან ფხიზლად, საქართველოს ევროპული ინტეგრაციის შანსთან ერთად, ძალიან დიდია რისკი, რომ ეს შესაძლებლობა “ქართულმა ოცნებამ” და ივანიშვილმა დააკარგვინოს საქართველოს და მის მოქალაქეებს.
არ ავყვეთ დეზინფორმაციას რადგან უნდა ვიცოდეთ, რომ სინამდვილეში საქართველოს სახელმწიფოს, მის თავისუფლებას აშშ-ს მსგავსი მეგობარი და მხარდამჭერი სახელმწიფო არ ჰყავს.
ღმერთმა დალოცოს საქართველო! ღმერთმა დალოცოს ამერიკა!” – ნათქვამია განცხადებაში.
შეგახსენებთ, რომ „ქართული ოცნებიდან“ გასულმა დეპუტატმა მიხეილ ყაველაშვილმა კელი დეგნანს ღია წერილით გუშინ მიმართა, სადაც წერია, რომ ვერავითარი „რუსული რბილი ძალა“ ვერ შეარყევს საქართველოში ამერიკის რეპუტაციას ისე, როგორც დეგნანის განცხადებები თუ დუმილი, „რომელიც ხალხმა ხელისუფლებაში „ნაციონალური მოძრაობის“ დაბრუნების მცდელობად შეიძლება აღიქვას“.
ყაველაშვილის წერილზე განცხადება გააკეთა საქართველოში ამერიკის შეერთებული შტატების ელჩმა. კელი დეგნანის თქმით, წერილი ბოლომდე ვერც კი წაიკითხა, რადგან „ქართული ოცნებიდან“ წასული დეპუტატის, მიხეილ ყაველაშვილის წერილი „სავსე იყო ტყუილებით და კონსპირაციული თეორიებით“.
