უკრაინის ელჩმა გერმანიაში, ანდრეი მელნიკმა EuroPravda-სთან ინტერვიუში განაცხადა, რომ რუსეთის პრეზიდენტ, ვლადიმერ პუტინს გერმანიის სტაბილურობა ხელში უჭირავს.
მისი თქმით, მიუხედავად ხალხის დარწმუნების მცდელობებისა, რომ გერმანია რუსეთზე დამოკიდებული სულაც არ არის, საბოლოოდ, ეს სიცრუე და „ჩვეულებრივი ზღაპარი“ აღმოჩნდა.
„მთავრობის განცხადებით, თუ ხვალ პუტინი გადაწყვეტს გაზის, ნავთობისა და ნახშირის გათიშვას, გერმანიაში კატასტროფა იქნება, მილიონობით ადამიანი უმუშევარი დარჩება და ეკონომიკის მთელი სექტორები უბრალოდ განადგურდება.
როგორც ხელისუფლების წარმომადგენლები, ასევე ანალიტიკოსები ამბობენ, რომ ეს ქვეყანაში სტაბილურობასა და სოციალურ მშვიდობას გამოუსწორებელ დარტყმას მიაყენებს. მიუხედავად იმისა, რომ რამდენიმე თვის წინ გერმანელმა მაღალჩინოსნებმა განაცხადეს, თითქოს რუსეთზე ასეთი დამოკიდებულება არ არსებობს და ყველაფერი კონტროლის ქვეშაა – ეს ჩვეულებრივი ზღაპარი აღმოჩნდა. ამიტომ ვგრძნობ, რომ საზოგადოებაში და ჟურნალისტებშიც რისხვა ყოველდღე უფრო მეტად იზრდება“, – აღნიშნა უკრაინელმა დიპლომატმა.
