გუშინ საღამოს, ვერაზე, გოგებაშვილის ქუჩაზე მდებარე კაფე LA VERA- სთან სროლის შედეგად მოკლული მამაკაცი 38 წლის საბა გახოკიაა. საბა გახოკიას, რომელმაც ბიზნესმენ გივი (გიჩო) მარგველაშვილი ფეხებში დაჭრა, დაცვის პოლიციის თანამშრომელმა საპასუხო ცეცხლი გაუხსნა, რის შედეგად გახოკია ადგილზე დაიღუპა. მკვლელობაში ბრალდებული დაცვის პოლიციის ინსპექტორი დაკავებულია, მას გაქცევა არც უცდია. ის დაჭრილი გივი (გიჩოს) დაცვაში მუშაობდა.
რაც შეეხება მოკლულ საბა გახოკიას, ის რამდენიმე ბიზნესს ფლობს. კერძოდ მის მფლობელობაში იყო ადგილობრივი და საერთაშორისო ტვირთების გადამზიდი კომპანია შპს „ტრანსკო”, სამშენებლო მასალების კომპანია შპს „ჯიმა ჯგუფი” ( JIMA GROUP) და სამშენებლო მანქანების და მოწყობილობების კომპანია შპს “ტრანსკო”.
როგორც წყარო გვეუბნება, გარდაცვლილი და დაჭრილი თანასკოლელები იყვნენ (53-ე სკოლა) და მათ თავიდანვე დაძაბული ურთიერთობა ჰქონდათ.
“მისი პირადი საქმეების შესახებ არაფერი ვიცი, ვერც მისი მოტივის შესახებ გეტყვით ვერაფერს. რაც ვიცი, საბა იყო უაღრესად კეთილი, თბილი და ადამიანების მოყვარული. ვინ და რატომ გაამწარა ასე, არ ვიცი, ერთად ვიზრდებოდით ძალიან პატარა ასაკიდან და არ მახსოვს, ვინმესთვის ხელი ზედმეტად დაეკარებინა, ან უმიზეზოდ ეწყენინებინა. მისი ვერცერთი მეგობარი ვერ გეტყვით, რომ საბა იყო მოძალადე, მხოლოდ სიკეთე და პოზიტივი იღვრებოდა მისგან. რა მოხდა, ამას იმედია გამოძიება დაადგენს”, – გვეუბნება მისი მეგობარი გუჩი თავხელიძე. საბა გახოკიას ერთი შვილი დარჩა.
ახალგაზრდა ბიზნესმენის მკვლელობას “ფეისბუკში” მისი მეგობრები ეხმაურებიან: “ეს დღესასწაული იყო საბა! სამაგალითო მეგობარი და სამაგალითო ბიჭი! როგორ დაგემშვიდობოთ მთელი კლასი, ადგილს ვერ ვპოულობთ ! ეს რა დღე გაგვითენდა ჩემო ერთგულო, კეთილო მეგობარო. წახვედი და წაიღე ჩვენი გულები! შეხვედრამდე მეგობარო, უამრავი ბედნიერი წელი ჩვენ ყველა ერთად! „ჩვენი კეთილი, თბილი და ტკბილი ბიჭი”. „ერთად გავიზარდეთ მე და საბა, სრულიად განადგურებული ვარ”…
წყარო: „ამბები ჯი”
