დღის ბოლოს “ტვ პირველზე” ყველა კრიტიკული მედიის წარმომადგენელი შეიკრიბება და გაერთიანებული ეთერი “მთავარი არხის” დამფუძნებელს მიეძღვნება.
ჟურნალისტი ინგა გრიგოლიას თქმით, ის რომ დაჭერილი ყოფილიყო ნიკა გვარამია ყველაფერს გააკეთებდა მის გასათავისუფლებლად, ამიტომაც ტელეწამყვანი აანონსებს, რომ დღეს მაყურებელს ძალიან საინტერესო გაერთიანებული ეთერი ელოდება. ასევე, მიმართავს პრეზიდენტსაც, რომ ერთხელ მაინც დადგეს პირად წყენებზე მაღლა და შეიწყალოს ნიკა გვარამია.
“ეს არ იქნება ერთდღიანი აქტიურობა. ჩვენ უნდა გავაკეთოთ ყველაფერი, რომ ნიკა გვარამიას თავისუფლებას მივაღწიოთ. ერთში ვარ დარწმუნებული, მე რომ დაჭერილი ვყოფილიყავი და მას რომ პირდაპირ ეთერში ემუშავა, ყველაფერს გააკეთებდა იმისათვის, რომ სამართალი დამდგარიყო. დღეს საღამოს იგეგმება კრიტიკული მედია საშუალებების ერთობლივი, საგანგებო, ძალიან საინტერესო ეთერი. ნიკა გვარამიას გათავისუფლების აუცილებლობაზე ისაუბრებენ ის ადამიანები, რომლებიც შესაძლოა პოლიტიკურად განსხვავებული პოზიციებით გამოირჩევიან, მაგრამ ყველა თანხმდება იმაზე, რომ ნიკა გვარამია უნდა იყოს გარეთ და აქვე, მე არ მჯერა რომ სალომე ზურაბიშვილისთვის რაიმეს თხოვნას აქვს აზრი, მითუმეტეს შეწყალებასთან დაკავშირებით, მაგრამ ეს არის ის შემთხვევა, როცა მას შეუძლია ერთხელ მაინც გადადგას ღირსეული ნაბიჯი და მხოლოდ მაშინ კი არ ილაპარაკოს რეპრესიებზე, როცა მისი ტერიტორიული სიმშვიდე ირღვევა, ერთხელ მაინც გადადგას ის ნაბიჯი, რომელიც გადასადგმელია, დადგეს პირად წყენებზე მაღლა, დადგეს “ოცნების” და მისი არაფორმალური ლიდერის დაკვეთაზე მაღლა და შეიწყალოს ნიკა გვარამია”, – ამბობს ინგა გრიგოლია.
