შეერთებულ შტატებსა და ევროპას შორის უთანხმოება წარმოიშვა უკრაინის ომის შედეგად გამოწვეული ეკონომიკური პრობლემების გამო, – ამის შესახებ RBC-Ukraine The Wall Street Journal-ზე დაყრდნობით იუწყება.
მედიის ცნობით, საფრანგეთის პრეზიდენტის ემანუელ მაკრონის ვიზიტი აშშ-ში სავარაუდოდ ვაჭრობასა და გეოპოლიტიკურ საკითხებს შეეხება.
ინფორმაციაში აღნიშნულია, რომ სრულმასშტაბიანი ომის დაწყების შემდეგ აშშ ცდილობს შეცვალოს რუსეთი, როგორც ენერგიის ერთ-ერთი უმსხვილესი მიმწოდებელი. თუმცა, ევროკავშირის ქვეყნებისთვის აშშ-დან გაზის მიწოდება გაცილებით ძვირია. ეს ამძიმებს ევროპის საწარმოო ბაზას.
გარდა ამისა, ევროკავშირს სჭირდება აშშ-ს მხარდაჭერა, რათა გააძლიეროს თავისი თავდაცვა და თავიდან აიცილოს დაპირისპირება რუსეთთან.
გამოცემის თანახმად, ევროპელი ლიდერები იწყებენ იმედგაცრუების გამოხატვას იმის გამო, რომ ისინი სულ უფრო მეტად ეყრდნობიან შეერთებულ შტატებს უსაფრთხოებისა და ეკონომიკური სტაბილურობისთვის.
მედიის ცნობით, სავარაუდოდ, მაკრონი ამ საკითხს აშშ-ში ვიზიტის დროს განიხილავს.
ფრანგული წყაროების თანახმად, მას სურს ზეწოლა მოახდინოს ბაიდენზე, რათა შეამციროს რუსეთსა და დასავლეთს შორის უკრაინის გამო უფრო ფართო კონფლიქტის რისკი.
ამასთან, მაკრონი აცხადებს, რომ უკრაინამ თავად უნდა გადაწყვიტოს, როდის და როგორ წარმართოს მოლაპარაკებები რუსეთის ფედერაციასთან.
ფრანგი ოფიციალური პირების თქმით, მაკრონი ხედავს აშშ-ის ახალ კანონს ინფლაციის შემცირების შესახებ, როგორც საფრთხეს ევროპული ინდუსტრიისთვის. ევროპელი პოლიტიკოსები შიშობენ, რომ ინფლაციის შემცირების და ელექტროენერგიის მაღალი ფასის გამო ბევრი კომპანია იფიქრებს წარმოების აშშ-ში გადატანაზე.
მედიის ცნობით, უთანხმოების მიუხედავად, მაკრონსა და ბაიდენს მეგობრული ურთიერთობა აქვთ. დაგეგმილია, რომ ვიზიტის ფარგლებში პრეზიდენტები, ასევე, განიხილავენ უკრაინის სამხედრო მხარდაჭერას.
