დელავერის შტატში, რეჰობოთ-ბიჩის სახლიდან აშშ-ის პრეზიდენტის ჯო ბაიდენის და პირველი ლედის ჯილ ბაიდენის ევაკუაცია განხორციელდა, რადგან პატარა კერძო თვითმფრინავი შეცდომით მათ სახლთან მდებარე საჰაერო სივრცეში შევიდა.
თეთრი სახლის განცხადებაში აღნიშნულია, რომ ბაიდენს და მის ოჯახს საფრთხე არ ემუქრება და გატარებულია პრევენციული ღონისძიებები.
სიტუაციის შეფასების შემდეგ ბაიდენი და მისი მეუღლე სახლში დაბრუნდნენ.
საიდუმლო სამსახურმა განაცხადა, რომ გასაუბრებას გამართავს პილოტთან, რომელიც, წინასწარი გამოძიების თანახმად, არ იმყოფებოდა სათანადო რადიო არხზე და არ ასრულებდა ფრენის მითითებებს.
ფედერალურმა საავიაციო ადმინისტრაციამ ამ კვირის დასაწყისში გამოაქვეყნა ფრენის შეზღუდვები ბაიდენის სანაპირო ქალაქში ვიზიტის წინ. შეზღუდვები მოიცავს 10 მილის (16 კმ) აკრძალულ ზონას. ეს არის სტანდარტული პრაქტიკა საპრეზიდენტო ვიზიტებისთვის ვაშინგტონის გარეთ.
ფედერალური რეგულაციები მფრინავებს ავალდებულებს მარშრუტის შეზღუდვების შემოწმებას აფრენამდე. თუმცა, ხშირია საჰაერო სივრცის შემთხვევითი დარღვევა, განსაკუთრებით დროებით აკრძალულ ტერიტორიებზე.
