ნანა გეგეჭკორის მიმართვა ციხის ექიმებს – “არ მინდა დავიჯერო რომ ეს რისკები არ გესმით”

May 3, 22:48
0
41

ამერიკაში მცხოვრები ექიმი, ნანა გეგეჭკორი:

“რადგან ხმა არ მიმიწვდება ციხის ექიმებთან, აქ დავწერ, იქნებ ასე გაიგონ…
ყოფილი პრეზიდენტის საკნიდან გამოსული ყველა რესპოდენტი ერთხმად იმეორებს, რომ მას არ შეუძლია გადაადგილება.
ხანგძლივი იმობილიზაცია, ნებისმიერ, თუნდაც ჯანმრთელ ადამიანში, არის მაღალი პროთრომბოტული რისკების შემცველი მდგომარეობა. ასეთ დროს ადვილად ფორმირდება თრომბი ქვემო კიდურების ღრმა ვენებში, მინიმალური მოძრაობის დროს, ამგვარი თრომბოტული მასა შეიძლება მოწყდეს და ფილტვის არტერიის თრომბოემბოლია გამოიწვიოს. ფილტვის არტერიის თრომბოემბოლია მაღალი ლეტალობის მქონე სისხლძარღვოვანი კატასტროფაა. ციხის პირობებში კი არა, გარეთ მყოფებშიც არ ვიცი რამდენადაა შესაძლებელი დროული და ადექვატური სამედიცინო დახმარების მიღება ასეთი კატასტროფის დროს.
ამავე დროს გასათვალისწინებელია, რომ პრეზიდენტ სააკაშვილს მნიშვნელოვანი ანემია აღენიშნება, რაც პროთრომბოტული მდგომარეობების პროფილაქტიკასაც და სისხლძარღვოვანი კატასტროფების მკურნალობასაც ურთულესს ხდის.
არ მინდა დავიჯერო რომ ეს რისკები არ გესმით. სამედიცინო სკოლის მეოთხე კურსელ სტუდენტს უკვე მოეთხოვება ამ რისკების ზედმიწევნით კარგად ცოდნა.
სხვა რისკებიც არსებობს ლოგინს მიჯაჭვული პატიმრისთვის უეცარი კატასროფების განვითარების.
ექიმები და ექთნები მაინც ნუ მიიღებთ ადამიანის მკვლელობაში მონაწილეობას. თქვენი პროფესიული ვალდებულება სიცოცხლის გადარჩენაა. ხელფასს ადამიანებისთვის ჯანმრთელობის და სიცოცხლის შენარჩუნებაში გიხდიან.”

Cesko