რუსული მედია სომხეთის მინისტრთა კაბინეტის წევრებზე დაყრდნობით წერს, რომ სომხეთის პრემიერი ნიკოლ ფაშინიანი რამდენიმე წუთის წინ რუსეთის პრეზიდენტ ვლადიმირ პუტინს ტელეფონით ესაუბრა.
მათივე ცნობით, საუბარი შეეხებოდა სომხეთ-აზერბაიჯანის საზღვარზე მიმდინარე სროლას და ადგილზე გამწვავებულ კონფლიქტს.
ამ დროისთვის დეტალები უცნობია, მანამდე ფაშინიანმა უშიშროების საბჭოს რიგგარეშე სხდომა მოიწვია.
სომხეთ-აზერბაიჯანის საზღვარზე სიტუაციის ესკალაციის გამო, სომხეთმა რუსეთსა და კოლექტიური უსაფრთხოების ხელშეკრულების ორგანიზაციას სამხედრო დახმარების თხოვნით მიმართა. ინფორმაციას ამის შესახებ სომხური მედია ავრცელებს.
კერძოდ, როგორც სომხურ მედიას სომხეთის მთავრობაში განუცხადეს, პრემიერ-მინისტრ ნიკოლ ფაშინიანის თავმჯდომარეობით, სომხეთის უშიშროების საბჭოს სხდომაზე მიღებულ იქნა გადაწყვეტილება, „სომხეთის სუვერენული ტერიტორიის მიმართ აგრესიასთან დაკავშირებით ოფიციალურად მიმართონ რუსეთის ფედერაციას მეგობრობის, თანამშრომლობისა და ურთიერთდახმარების შესახებ ორმხრივი შეთანხმების დებულებების ასამოქმედებლად, ასევე კოლექტიური უსაფრთხოების ხელშეკრულების ორგანიზაციასა და გაერო-ს“.
შეგახსენებთ, სომხეთ-აზერბაიჯანის საზღვარზე შეტაკებები შუაღამისას დაიწყო და ამ დრომდე გრძელდება. ვრცელდება ინფორმაცია, რომ მსხვერპლია ორივე მხარეს. ერევანი და ბაქო შექმნილ სიტუაციაზე პასუხისმგებლობას ერთმანეთს აკისრებენ.
