საუდის არაბეთმა მიანიშნა, რომ ზოგიერთი ევროპული ვალის აქტივის გაყიდვას არ გამორიცხავს, თუ „დიდი შვიდეული“ გაყინული რუსული აქტივების კონფისკაციას გადაწყვეტს, რომელთა ოდენობა 300 მლრდ. აშშ დოლარს შეადგენს. ამის შესახებ სააგენტო Bloomberg იუწყება.
საუდის არაბეთის ფინანსთა სამინისტრომ უკვე აცნობა „დიდ შვიდეულს“, რომ ის არ ეთანხმება იდეას, რომლის მიხედვით კონფისკაციის შედეგად ამოღებული რუსული ფულით უკრაინის დახმარება მოხდება. ორი წყაროს ცნობით, ერ-რიადმა, კონკრეტულად, საფრანგეთის ხაზინის მიერ გამოშვებული ვალი დაასახელა.
მიმდინარე წლის მაისსა და ივნისში G-7 რუსეთის ცენტრალური ბანკიდან ამოღებული თანხების გამოყენების სხვადასხვა ვარიანტს განიხილავდა. საბოლოოდ ჯგუფი იმაზე შეთანხმდა, რომ გაყინული აქტივებისგან მიღებული მოგების გამოყენება მოხდეს, ხოლო თავად აქტივები ხელშეუხებელი დარჩეს. აშშ და დიდი ბრიტანეთი უფრო ხისტ ვარიანტებს მოითხოვდნენ, როდესაც მთელი აქტივების გამოიყენება მოხდებოდა. ევროზონის ქვეყნების წარმომადგენლებს ჰქონდათ შეშფოთება, რომ ამან შეიძლება ევრო გააუფასუროს.
საბოლოო გადაწყვეტილებაზე, სავარაუდოდ, საუდის არაბეთის პოზიციამაც იმოქმედა.
„არანაირი მუქარა არ ყოფილა. ჩვენი ურთიერთობები „დიდ შვიდეულთან“ და სხვა ქვეყნებთან ურთიერთპატივისცემაზეა აგებული. ჩვენ ვაგრძელებთ იმ საკითხების განხილვას, რაც გლობალური ეკონომიკის ზრდას და საერთაშორისო ფინანსური სისტემის გამყარებას ხელს უწყობს“, – განაცხადეს საუდის არაბეთის ფინანსთა სამინისტროში.
საუდის არაბეთის აქტივები ევროებსა და ფრანგულ ობლიგაციებში ათობით მილიარდ ევროს შეადგენს. ეს გლობალური ბაზრის მასშტაბით ბევრი არ არის, მაგრამ ევროპის ოფიციალური პირები შიშობენ, რომ საუდის არაბეთის აქტივების გაყიდვის შემთხვევაში მის მაგალითს სხვა ქვეყნებიც გაიზიარებენ.
როგორც გამოცემას ერთ-ერთმა წყარომ აცნობა, საუდის არაბეთის მთავრობის სტილი არ არის, რომ ვინმეს დაემუქროს, აქ საუბარი იყო მოსალოდნელ შედეგებზე, რაც ერ-რიადმა „დიდ შვიდეულს“ აცნობა. მას შემდეგ, რაც G7-ის პოზიცია შერბილდა, საუდის არაბეთმაც პოზიცია შეცვალა.
უცნობია, მოქმედებდა თუ არა საუდის არაბეთი საკუთარი ინტერესებიდან გამომდინარე, რადგანაც არ სურდა, რომ ქვეყნებისთვის აქტივების ჩამორთმევის პრეცედენტი შექმნილიყო, თუ ეს რუსეთთან სოლიდარობის ნიშნად გაკეთდა. ერ-რიადსა და მოსკოვს შორის საკმაოდ მჭიდრო ურთიერთობებია და ის შენარჩუნდა უკრაინის წინააღმდეგ რუსეთის სამხედრო აგრესიის შემდეგ. ეს ქვეყნები ორგანიზაცია OPEC-ს უდგანან სათავეში. ამასთანავე, საუდის არაბეთს აქვს კარგი ურთიერთობები უკრაინასთან და ქვეყნის პრეზიდენტი ვოლოდიმირ ზელენსკი ერთი თვის წინ ერ-რიადში იმყოფებოდა. ზელენსკი საუდის არაბეთის მემკვიდრე პრინცს მოჰამედ ბენ სალმანს შეხვდა.
საუდის არაბეთის ეს ქმედებები მიუთითებს, რომ მსოფლიო პოლიტიკის არენაზე მისი გავლენა იზრდება, ხოლო „დიდი შვიდეული“ საკმაოდ სერიოზულ პრობლემებს აწყდება სხვადასხვა საკითხში გლობალური სამხრეთის ქვეყნების მხარდაჭერის მხრივ. ეს, ძირითადად, უკრაინის ომის საკითხებს ეხება.
პრინც მოჰამედის დროს, რომელიც საუდის არაბეთის ფაქტობრივი მმართველია, ერ-რიადი სულ უფრო მეტს აქტიურობს როგორც დიპლომატიური ცენტრი, და კიევსა და მოსკოვს შორის შუამავლობას არ გამორიცხავს.
იტალიაში „დიდი შვიდეულის“ სამიტზე მიმდინარე წლის ივნისში ამ ქვეყნების ლიდერები შეთანხმდნენ ფინანსურ მოდელზე, რომლის მიხედვით უკრაინა 50 მლრდ აშშ დოლარის დახმარებას მიიღებს. უკრაინა მიიღებს კრედიტებს, რომელთა დაფარვა მოხდება გაყინული რუსული ფონდებიდან მიღებული მოგებიდან, რაც 260 მლრდ ევროს შეადგენს და რომელთა უმეტესობა ევროპაშია. ეს სახსრები, სავარაუდოდ, წელიწადში 3-დან 5 მლრდ დოლარამდე მოგებას მოიტანს.
საუდის არაბეთი მსოფლიოში ნავთობის უდიდესი ექსპორტიორია. მისი ცენტრალური ბანკის სუფთა სავალუტო რეზერვები 445 მლრდ აშშ დოლარს შეადგენს. სუვერენული სარეზევრო ფონდი 1 ტრილიონი დოლარის აქტივებს ფლობს.
ამ აქტივების უდიდესი ნაწილი დოლარებშია. საუდის არაბეთი აშშ-ის სახაზინო ობლიგაციებს ფლობს, რომლის ოდენობა 135 მლრდ დოლარია. გავრცელებული ცნობების მიუხედავად, რომ საუდის არაბეთმა, შესაძლოა, ნავთობი სხვა ვალუტებში გაყიდოს, ის ნავთობით ვაჭრობას კვლავ დოლარებში განაგრძობს. საუდის არაბეთის მაღალჩინოსნების აზრით, ეს სამეფოს ეკონომიკისთვის უკეთესია, ვიდრე ნავთობით ვაჭრობის სხვა ვალუტებში განხორციელება. შესაბამისად, საუდის არაბეთს არც ისე ბევრი სავალუტო ალტერნატივა აქვს და ყველაზე მეტად მაინც დოლარს და ევროს ენდობა.
