,,გავჩუმდე, იმიტომ, რომ ჩემი სამი შვილი ახლა სახლშია უსაფრთხოდ და სხვისი ანგელოზი შვილები რამდენიმე მეტრის სიღრმის ტალახში?!” – მანუჩარ ახალაია

August 7, 07:59
0
1910
სოციალურ ქსელში ვრცელდება მანუჩარ ახალაიას პოსტი ბევრი კითხვით, რომელიც შოვის ტრაგედიას ეხება.
,,სამი დღეა, ამ ჯოჯოხეთის შემყურე ხმას ვერ ვიღებ. თქვენ მართლა ხომ არ გაგიჟდით, სახედაკარგულო „მორალისტებო“, დუმილისკენ რომ მოგვიწოდებთ, კითხვების დასმაზე რომ გვამუნათებთ და ისე წარმოაჩენთ, თითქოს ვინმეს გაუხარდა ეს ტრაგედია. ნებისმიერი ოჯახი შეიძლება იქ ვყოფილიყავით, ნებისმიერის შვილი შეიძლება მოხვედრილიყო ამ ჯოჯოხეთში. რაზე საუბრობთ საერთოდ? რაზე ფიქრობთ? რაზე გვიკითხავთ მორალს? დიახ, არავის არ უნდოდა ეს სტიქიური უბედურება! დიახ, ბუნების ძალის წინაშე ყველანი უძლურები ვართ, მაგრამ
არა გვაქვს უფლება, დავსვათ მინიმუმ ეს კითხვები?
– რატომ არ ჰყავს ქვეყანას სამაშველო ვერტმფრენები?
– რატომ არ გვაქვს თანამედროვე თერმული და ღამის ხედვის დრონები?
– რატომ არა აქვს გმირ, ვაჟკაც მაშველებს თანამედროვე აუცილებელი ტექნიკა და აღჭურვილობა?
– რატომ იკაფება უკანონოდ ასეულობით ჰექტარი ტყე?
– რატომ არ ყენდება მონიტორინგისთვის აუცილებელი აპარატურა?
– რატომ არ კეთდება სწორი დასკვნები წინა ტრაგედიებიდან?
– რატომ გაიცემა სამშენებლო ნებართვები საშიშ ადგილებში?
– რატომ არ სრულდება გარემოს დაცვის კუთხით გაცემული რეკომენდაციები?
რას ნიშნავს დუმილი, რას ნიშნავს გაჩუმება? გავჩუმდე, მხოლოდ იმიტომ, რომ ჩემი სამი შვილი ახლა სახლშია უსაფრთხოდ და სხვისი ანგელოზი შვილები რამდენიმე მეტრის სიღრმის ტალახში არიან ჩაფლულები? გავჩუმდე მხოლოდ იმიტომ, რომ დღეს უშუალოდ ჩემს სახლში არ არის გლოვის ზარი? მიმიფურთხებია ასეთი დუმილისთვის, მიმიფურთხებია ასეთი დამოკიდებულებისთვის, ასეთი ქართველობისთვის.
სულ ფეხებზე მკიდია ამ დროს პოზიციაც და ოპოზიციაც, სახელმწიფო მინდა… სახელმწიფო, გამართული ინსტიტუტებით და პასუხისმგებლობის მქონე ჩინოვნიკებით, სახელმწიფო მინდა ისეთი, სადაც შენი, ჩემი, ნებისმიერი მოქალაქის შვილი, თითოეული ადამიანის სიცოცხლე და მისი დაცვა იქნება უზენაესი. არავინ იცის, ვის რა გველოდება ხვალ, ზეგ, სად, რა ვითარებაში აღმოვჩნდებით ჩვენ, ან ჩვენი ოჯახის წევრები.
თანასწორნი ვართ ყველა ბუნებისა და უფლის წინაშე, ამიტომ დუმილი კი არა, განგაშის ზარები უნდა შემოვკრათ ყველამ იმისათვის, რათა მომავალში მაინც გადავარჩინოთ ადამიანები”, – წერს მანუჩარ ახალაია ფეისბუქპოსტში (05.08.2023).
Cesko