ანი დვალიშვილი
ჰო… დაახლოებით ასე იყო ეს ამბავი – ლევან ხაბეიშვილმა განაცხადა, მე პარტიის თავმჯდომარეობა არ მინდაო, მელიას ფლანგი მთლიანად ლევან ვარშალომიძეზე გადაერთო და საბოლოო ჯამში, „ხაბე დაითანხმეს“. სინამდვილეში კი, არც არავის „გაკერვა“ არ იყო საჭირო, იმთავითვე ცხადი გახდა, რომ ამ ყველაფრის უკან სამი ყოფილი ძალოვანი მინისტრი იდგა – მერაბიშვილი, კეზერაშვილი, შაშკინი. ოფიციალური, სატელევიზიო უარყოფის მიუხედავად, „ალიას“ მტკიცებით ფორმაში გვეწერა, რომ ორი ლევანიდან მელიას მეტოქე ერთი იქნებოდა და საბოლოოდ, ხაბეიშვილი შეირჩა. შეირჩა იმიტომ, რომ ვარშალომიძეს არ სურს აკეთოს ის, რისი გაკეთებაც ხაბეიშვილს მოუწევს.
ჯერ კიდევ მთავარ ოპოზიციურ პარტიაში მიმდინარე მოვლენები არც ისე მარტივია, როგორც ერთი შეხედვით ჩანს. დავიწყოთ იმით, ვინ არის ნიკა მელია, საიდან მოვიდა ის და როგორ გახდა პარტიის თავმჯდომარე? მელია პარტიაში მისვლის დროს ანზორ მელიას ბიჭი იყო და მას სააკაშვილმა ქართული პოლიტიკის ამომავალი ვარსკვლავი უწოდა. ჰოდა, ეს ვარსკვლავი პარტიის თავმჯდომარე გახდა და მას ძველი ფრთა არ შეეწინააღმდეგა, ისინი, ვინც რეალურად სააკაშვილის მთავარი საყრდენები იყვნენ პარტიაში და მიშას შემდეგ მთავარი სიტყვა ეთქმოდათ. გავიდა დრო და მელიამ არამარტო დამოუკიდებლად დაიწყო გადაწყვეტილებების მიღება და რეგიონებშიც კი, საკუთარი გუნდის მშენებლობა დაიწყო. ეს არ მოეწონათ ძველებს, კონკრეტულად კი ლევან ვარშალომიძეს, ბადრი ბასიშვილს, დავით კირკიტაძესა და გიორგი ბოტკოველს. მათ ყველაფერი დალაგებული ჰქონდათ აჭარაში, შიდა ქართლში, ქვემო ქართლსა და კახეთში. შესაბამისად, მელიას გუნდისთვის იქ ადგილი ვერ გამოიძებნა და ნიკამაც საკუთარი თანამდებობა გამოიყენა, „ძველების“ საახლობლო და სამეგობრო გვერდზე გაწია და გზა თავისი გუნდის წევრებს დაუთმო. სწორედ ამის შემდეგ აყვირდა ძველი გვარდია და მელიასთან დაპირისპირებამაც პიკს მიაღწია. ბოლო დროს გავრცელებული ინფორმაცია, რომ ნაციონალური მოძრაობის ოფისში მუშტი-კრივიც კი გაიმართა, სააშკარაოზე ახლა გამოვიდა, რადგან დამალვას აზრი აღარ ჰქონდა, თორემ ჩხუბი მანამდეც მოხდა და მელიაზე დავით კირკიტაძემ გაიწია, ბასიშვილმა აგინა… ეს იყო დაახლოებით ნახევარი წლის წინ და მაშინ ძველები შეეცადნენ მელია თავისი ნებით წასულიყო, მაგრამ არ გამოვიდა, რადგან მას მხარი აკაკი მინაშვილმა და გია ბარამიძემ დაუჭირეს. ისინიც ძველი გვარდიის წარმომადგენლები არიან, მაგრამ სიმართლე რომ ვთქვათ, ისინი არ არიან პარტიისთვის ხმების მომტანი, ამას სწორედ ზემოთ ჩამთვლილი ადამიანები აკეთებდნენ და ამიტომ, პრეტენზიებიც მათ ჰქონდათ.
ჰოდა, სწორედ ძველებმა შექმნეს „ახალი მელია“, პოლიტიკის ახალი ვარსკვლავი, ლევან ხაბეიშვილი, კაცი, რომელსაც ზურგს არც მამის სახელი უმაგრებს და თავმჯდომარეობას სწორედ მას მიართმევენ ლანგრით. ძველების გათვლით, ხაბეიშვილი, მელისგან განსხვავებით, კონტროლიდან არ უნდა გავიდეს, მას არ უნდა გაუჩნდეს იგივე ამბიციები, როგორიც მელიას და რაც მთავარია, მან უნდა გაითვალისწინოს სწორედ ამ ადამიანების აზრი, პარტიის თავმჯდომარე ფორმალურად იყოს, რეალურად კი აკეთოს ის, რასაც ძველები ეტყვიან. ძველებში იმავე მინაშვილსა და ბარამიძესაც ვგულისხმობთ, რადგან მათ არც ხაბეიშვილი შეეხება და არც ძველი მეგობრები ეტყვიან, გვერდით გაიწიეო. მეტიც, როცა ხაბეიშვილმა დაიჯერა, რომ პარტიის თავმჯდომარეობაზე მის კანდიდატურას აყენებდნენ, მეორე დღეს კლასიკურად ჩაცმული დაენახა კამერებს, მოკლე ლაბადა, თეთრი პერანგი… როგორც ნაცმოს წევრები გვიყვებიან, ამის გამო ის გააკრიტიკეს და უთხრეს, რომ ისეთივე უნდა დარჩეს, როგორსაც ხალხი იცნობს და ახლა, ხაბეიშვილი რეგიონებში კვლავ მაისურითა და მოკლე ქურთუკით დადის და ცდილობს, აქტივს საკუთარი უპირატესობის შესახებ ესაუბროს, მაგრამ ეს აქტივი გააკეთებს იმას, რასაც ეტყვიან კირკიტაძე, ბასიშვილი, ვარშალომიძე, ბოტკოველი… ანუ, მელიას რეალურად შანსი არ აქვს, რადგან მხოლოდ თბილისის იმედზე ყოფნა, არასერიოზულია. ეს არის ის, რაც დღეს ნაციონალურ მოძრაობში ხდება და… ისიც გვითხრეს, ნიკა რომ დარწმუნდება, არჩევნებს უეჭველად აგებს, კანდიდატურას მოხსნის და არამარტო პარტიიდან, პოლიტიკიდანაც კი წავაო. ანუ, ის ხაბეიშვილის სასარგებლოდ კი არ მოხსნის კანდიდატურას, არამედ იტყვის, რომ მიდის და ახალ შემადგენლობას ხელს არ შეუშლის. ეს არ იქნება მარცხი, რადგან არჩევნები არ ჩატარდება და არავის ეცოდინება, რა მოხდებოდა რეალურად, თუმცა აქამდე მელია ჯერ უნდა მივდეს, ან… ან უნდა მიიყვანონ.
