უკრაინის ქალაქ ხარკოვში 17-25 სექტემბერს ლგბტ+ ფესტივალი ჩატარდება. როგორც ღონისძიების Facebook-გვერდზეა აღნიშნული, ფესტივალის ფარგლებში გაიმართება რუსეთის აგრესიის შედეგად გარდაცვლილი ლგბტ+ თემის წარმომადგენლების ხსოვნის საღამო, პერფორმანსი ქორწინების თანასწორი უფლებების შესახებ და, საკუთრივ, მსვლელობა.
„ვიცით, რომ ჩვენი ქვეყანა ახლა რთულ პერიოდს განიცდის. ჩვენი მიზანია, ხაზი გავუსვათ თავისუფლების, თანასწორობის და მრავალფეროვნების პატივისცემის მნიშვნელობას, ასევე ვაჩვენოთ მსოფლიოს განსხვავება რუსეთის ტოტალიტარულ რეჟიმსა და უკრაინას შორის. უკრაინა გლობალურ ბოროტებას ებრძვის. ამ ბრძოლაში აქტიური წვლილი შეაქვს ლგბტ+ საზოგადოებას. თუ ლგბტ+ ადამიანებს შეუძლიათ, თავი შესწირონ საკუთარ ქვეყანას, სახელმწიფომ მათ ისეთივე უფლებები უნდა მიანიჭოს, რაც სხვებს“, – აცხადებენ ფესტივალის ორგანიზატორები.
