უკრაინის „ერთ-ერთი ყველაზე მტკიცე მოკავშირე“ ესპანეთი კიევს განუდგა, – ამის შესახებ ნათქვამია Newsweek-ის სტატიაში „უკრაინის ყველაზე სავალალო მიმწოდებელი“, რომლის ავტორიც ჟურნალისტი ხორხე გონსალეს-გალარსაა.
„რთული დრო ნამდვილი მეგობრობის ყველაზე კარგი ტესტია. მაშინ, როდესაც მთელი მსოფლიო ჯიუტად დგას უკრაინის გვერდით, კიევის ერთ-ერთი ყველაზე მტკიცე თვითგამოცხადებული მოკავშირე ვერ აწვდის იარაღს, რომელსაც დაჰპირდა. როგორც ჩანს, ესპანეთმა აითვისა დიპლომატიის ხელოვნება: გულუხვად დადებული პირობები და მწირი მიწოდება. როცა ასეთი მოკავშირეები გყავს, რა საჭიროა მტრები?“ – წერს ხორხე გონსალეს-გალარსა.
მისივე თქმით, კიევში ვიზიტის დროს ესპანეთის პრემიერ-მინისტრმა, პედრო სანჩესმა პირობა დადო, რომ უკრაინას დაეხმარებოდა.
„4 თვის შემდეგ, მსუბუქი თავდაცვითი არტილერია, სასწრაფო დახმარების დაჯავშნული მანქანა და 200 ტონა ანტისატანკო შეიარაღება არის ის, რაც ზელენსკიმ სანჩესისგან მიღებული დახმარების სახით შეიძლება განკარგოს. აპრილის ბოლოს ესპანეთმა პოლონეთის გავლით უკრაინაში 40 ტანკი გაგზავნა. უკრაინელი მეთაურები ფიქრობდნენ, რომ ეს არის ესპანეთის დახმარება, თუმცა ტანკებმა შეიარაღება დაცალეს და ისევ ესპანეთში დაბრუნდნენ.
ივნისში ესპანეთმა განაცხადა, რომ უკრაინისთვის Leopard 2A4-ის ტიპის 40 ტანკის გაგზავნას აპირებს. შეიარაღების მიწოდებაზე თანხმობა მწარმოებელ ქვეყანას, გერმანიას უნდა გაეცა. რამდენიმე დღეში ცნობილი გახდა, რომ ესპანეთს ბერლინში ფორმალური მოთხოვნაც არ გაუგზავნია. მადრიდის განაცხადი ჯერ 10 ტანკამდე შემცირდა, ორი თვის შემდეგ კი ესპანეთის თავდაცვის მინისტრმა საერთოდ მოხსნა ეს შეთავაზება დღის წესრიგიდან. მისი განცხადებით, ტანკების სავალალო მდგომარეობა მათ მომხმარებლებსვე შეუქმნიდა საფრთხეს“, – აღნიშნულია სტატიაში.
