ბოლო პერიოდში გახშირდა საუბრები, რომ გაქირავებული ბინის ქირას დამქირავებელი არ იხდის და ბინიდან მისი გამოშვებაც ვერ ხერხდება. აღნიშნულის ძირითადი მიზეზი წერილობითი კონტრაქტის არ არსებობაა, რადგან გამქირავებლები თავს სავარაუდოდ გადასახადის გადახდას არიდებენ, რადგან ქირავნობის ხელშეკრულების გაფორმების შემთხვევაში იგი 5%-ით იბეგრება.
როგორც იურიდიული ფირმა GLG Legal-ის იურისტი თამუნა სოლოღაშვილი „ანალიტიკაში“ განმარტავს, იქიდან გამომდინარე, რომ საპოლიციო გამოსახლება 2015 წლიდან აღარ არსებობს, მსგავსი ფაქტის არსებობის შემთხვევაში, გამქირავებელმა სასამართლოს უნდა მიმართოს.
„ბოლო პერიოდში ქვეყანაში უცხო ქვეყნის ბევრი მოქალაქე შემოდის, რამაც ქირაზე მოთხოვნის ზრდა გამოიწვია. თუმცა მოთხოვნის ზრდასთან ერთად, სამართლებრივი რისკებიც იზრდება. ეს რისკი ძირითადად ისაა, რომ დამქირავებელმა ქირა არ გადაიხადოს და დიდი ხნის განმავლობაში ადამიანის საკუთრებიდან არ გამოვიდეს”, – ამბობს იგი.
თამუნა სოლოღაშვილი ასევე განმარტავს, რა უნდა გააკეთოს მესაკუთრემ, იმისათვის, რომ აღნიშნული რისკები მინიმუმამდე იყოს დაყვანილი.
“მანამ სასამართლო დავამდე მოვალთ, არის რაღაც ბერკეტები, რაც რისკებს ამცირებს. ეს არის წერილობითი ქირავნობის ხელშეკრულების შედგენა. უცხოელის შემთხვევაში კი განსაკუთრებით მნიშვნელოვანია, რომ ორენოვანი ხელშეკრულება შევადგინოთ და მასში გარკვეული მექანიზმები ჩაიდოს. მაგალითად, თუ 1-2 თვის განმავლობაში დამქირავებელი ქირას არ გადაიხდის, ხელშეკრულება შეწყდეს და ა.შ.
ქირავნობის ხელშეკრულებაში ასევე ისეთი დეტალები უნდა გავითვალისწინოთ, როგორიცაა მოქმედი პასპორტის ასლის დართვა და სხვა მაიდენტიფიცირებელი მონაცემები, რადგან მისი იდენტიფიცირება თუნდაც სასამართლოს წარმოების ეტაპზე შესაძლებელი იყოს”, – განაცხადა მან.
