„გამთენიას სიკვდილს ჩავხედე თვალებში, 7 ჭურვი ჩემგან 10 მეტრის დაშორებით ჩამოვარდა,“ – ამბობს ბათუმელი მეზღვაური. ის დროულად შველას და სამშვიდობოს გაყვანას ითხოვს.
მეზღვაურის თქმით, ბერძნული კომპანიის გემი, რომელიც მალტის დროშის ქვეშ ცურავს, უკვე სამი დღეა ოდესის ოლქში მდებარე რენის პორტშია გაჩერებული. გამთენიისას პორტს რუსები უპილოტო დრონებით თავს დაესხნენ. დრონებით შეტევის შედეგად, მეზღვაურების ინფორმაციით, რენის პორტში არავინ დაშავებულა.
რენის პორტი, უკრაინა.
ჭურვის ანასხლეტი, რაც მეზღვაურმა გემბანზე გადაიღო.
„…ძირითადად განადგურდა პორტის რამდენიმე საწყობი, გემზე ჭურვი არ ჩამოვარდნილა, თუმცა ვნახეთ ანასხლეტები,“ – გვიყვება ერთ-ერთი ბათუმელი მეზღვაური. მასთან ერთად გემზე კიდევ 5 ქართველი და 11 უკრაინელი მეზღვაურია.
„მაშინვე ყველა გავაღვიძე, როგორც კი, პირველი ჭურვის ჩამოვარდნის ხმა გავიგე. ვიდეოც გადავიღე და აი, გემბანზე პატარა კიბე რომ ჩანს, იქ ჩავწექი, სხვებიც ჩაწვნენ გემბანზე. სულ 7 აფეთქების ხმა გავიგე ჩემგან ძალიან ახლოს,“ – ამბობს მეზღვაური.
ბათუმელი მეზღვაური ამბობს, რომ არ იცის, დახმარებისთვის ვის მიმართოს. გემზე ოდესიდან ელიან წარმომადგენელს, მეზღვაურებს ავტობუსებით სამშვიდობოს გაყვანას დაჰპირდნენ.
ბათუმელი პირველად ასულა გემზე, როგორც მეზღვაური. ის მატროსია.
„სტამბოლში ავედი გემზე, ვიცოდი, რომ ბერძნების გემია, სადაც ძირითადად უკრაინელები არიან. ჩვენ ტვირთი უნდა ჩაგვეტანა პორტუგალიაში.
რენი რუმინეთის საზღვართანაა, ჩვენ უკრაინის მხარეს ვდგავართ. გემის ჩატვირთვა შეწყდა და პორტიც დაცარიელდა, აქ აღარავინ რჩება. არ ვიცი, ვინ უნდა დაგვეხმაროს, ვითხოვთ ყურადღებას,“ – გვითხრა მეზღვაურმა.
რენის პორტი, უკრაინა
წყარო:batumelebi.netgazeti.ge
