14 ივლისს გავრცელდა ინფორმაცია, რომ მსახიობ გია ფერაძის ქალიშვილი მარიკუნა მიქატაძე გარდაიცვალა. აქამდე უცნობი იყო, კონკრეტულად როგორ, რა ვითარებაში გარდაიცვალა ახალგაზრდა ქალი, თუმცა ცნობილია ის, რომ მარიკუნა საბერძნეთში იმყოფებოდა. გარდაცვლილის ბიძა ილია ფერაძე “ამბებთან” საუბარში ამბობს, რომ ბოლო დროს ძმისშვილთან ურთიერთობა არ ჰქონია, მისი ინფორმაციით, მარიკუნას საქართველოში ოთხშაბათს ჩამოასვენებენ.
“ყველაფერი “ფეისბუქიდან” გავიგე, ერთი რამე რაც ვიცი, მარიკუნას ოთხშაბათს ჩამოასვენებენ. რა იქნება, პანაშვიდები, როგორ იქნება, არ ვიცი, სამწუხაროდ, ის ცალკე, თავისთვის ცხოვრობდა და ჩემს ოჯახთან არ ჰქონდა ურთიერთობა.
ბიძინა გარკვეული მიზეზების გამო არ იყო საქართველოში, შორს მუშაობდა. დასთან არც ჩვენ გვაქვს ურთიერთობა. როგორც ვიცი, ოთხშაბათს ჩამოასვენებენ. გულგახეთქილი ვარ, ჩემი ძმისშვილი იყო, მაგრამ, სამწუხაროდ, ბოლო დროს არ გვქონდა ურთიერთობა.
მარიკუნა ორჯერ იყო დაოჯახებული, პირველი მეუღლისგან გოგონა ჰყავს.
საბერძნეთში თავისი მეგობრის ოჯახის მიწვევით იყო.
გარდაცვალების დეტალებთან დაკავშირებით არაფერი ვიცი, იმის გარდა, რაც საჯაროდ იწერება.” – ამბობს ილია ფერაძე.
მსახიობ გია ფერაძეს ოთხი შვილი ჰყავდა. მარიკუნა მიქატაძე მას მესამე მეუღლისგან, ირინა მიქატაძისგან შეეძინა. მარიკუნა მცირეწლოვანი იყო, როდესაც დედის გარეშე დარჩა, რის მერეც ბაბუამ და ბებიამ – ჯუნა მიქატაძემ და მისმა მეუღლემ მარიკა საყვარელიძემ შვილად აიყვანეს და გაზარდეს.
სოციალურ ქსელში “ნანუკა ჟორჟოლიანის შოუ” ვიდეოს ავრცელებს შემდეგი ტექსტით:
“ეს მარიკუნა მიქატაძეა. გია ფერაძის შვილი, რომელმაც მთელი ცხოვრება ობოლმა იცხოვრა, გაიარა უამრავი სირთულე მაგრამ ერთი წუთით არ გაბოროტდა, ბოლომდე ადამიანად დარჩა.
მარიკუნა, გარდაცვლილი იპოვეს საბერძნეთში. გამოძიების თითქმის დადასტურებული ვერსიით, ის მოტოციკლზე დაჯდომას ცდილობდა, როცა მოაჯირიდან ჩავარდა და ხერხემლის
მძიმე დაზიანებით გარდაიცვალა“, – აღნიშნულია ტექსტში.
